Sinabi ni Makati City Rep. Luis Jose Angel Campos Jr. kamakailan na maaari pa ring mabawi ng mga papalabas na pasaherong Filipino ang kanilang mga gastusin sa airfare sakaling ma-miss ang kanilang mga flight. Si Campos, na vice chair ng House committee on appropriations, ay nagsabi na ang 2024 national budget ay may kasamang espesyal na probisyon para sa mga gastos sa paglalakbay ng mga pasaherong papalabas sa ibang bansa na na-cancel ang kanilang mga flight dahil sa mahabang interogasyon ng mga opisyal ng Bureau of Immigration (BI).
Binanggit ng mambabatas na itinulak ni Sen. Francis Escudero ang reimbursement sa mga gastos ng paglalakbay ng mga pasaherong Pilipino na na-offload mula sa kanilang mga flight dahil sa patuloy na pakikipaglaban sa human trafficking. Binanggit din ni Escudero ang mga rekord ng immigration na nagpapakita na 32,404 Filipino ang hindi pinayagang lumipad noong 2022 at 472 lamang sa kanila ang napag-alamang biktima ng human trafficking o illegal recruitment, ulat ayon sa Inquirer.net. (Romeo Adriano Jr.)
Photo: Jae Tabuada
COMMENTS